Ikipe y’Igihugu ya Repubulika Iharanira Demokarasi ya Congo (RDC) yatangiye neza urugendo rwayo mu Gikombe cy’Isi cya 2026 nyuma yo kunganya na Portugal igitego 1-1 mu mukino wa mbere wo mu Itsinda K wabereye kuri NRG Stadium i Houston muri Leta Zunze Ubumwe za Amerika.
Portugal yatangiye umukino isatira cyane maze ifungura amazamu hakiri kare ku munota wa gatandatu ibifashijwemo na João Neves, watsinze n’umutwe nyuma y’umupira mwiza wari uvuye kuri Pedro Neto. Iki gitego cyahaye icyizere abakunzi ba Portugal bari biteze ko ikipe yabo yakomeza kwiharira umukino.
Nubwo Portugal yamaranye umupira igihe kinini kandi ikagerageza kurema uburyo bwinshi bwo gutsinda, RDC yakomeje kwitwara neza mu bwugarizi no kugerageza gusatira binyuze mu bakinnyi bayo barimo Yoane Wissa na Cédric Bakambu.
Ku munota wa nyuma w’igice cya mbere, RDC yabonye corner yabyaye umusaruro, Yoane Wissa atsinda igitego cy’umutwe cyishyuraga Portugal. Iki gitego cyabaye amateka kuko ari cyo cya mbere RDC itsinze mu Gikombe cy’Isi kuva ubwo yaherukaga kwitabira irushanwa bwa nyuma mu 1974 icyitwa Zaïre.
Mu gice cya kabiri, Portugal yakomeje gusatira ishaka igitego cy’intsinzi. Cristiano Ronaldo, Bruno Fernandes na Rafael Leão bagerageje gushaka uburyo bwo guca mu bwugarizi bwa RDC, ariko umunyezamu Lionel Mpasi hamwe na ba myugariro be bakomeza kwihagararaho. Umutoza Sébastien Desabre yari yateguye neza ikipe ye, ikina yugarira neza ikanihutisha ibitero byihuse igihe ibonye umupira.
Nubwo Portugal yakoze impinduka zitandukanye mu minota ya nyuma, ntiyabashije kubona igitego cy’intsinzi. Umukino warangiye amakipe yombi anganyije igitego 1-1, buri ruhande rutahana inota rimwe.
Iyi ntsinzi y’agaciro kuri RDC iyishyira mu mwanya mwiza mbere y’imikino izakurikiraho mu Itsinda K, aho izahura na Colombia tariki ya 23 Kamena, mu gihe Portugal izacakirana na Uzbekistan kuri uwo munsi.
- 0
- 0
- 0
- 0
