Mu bice bitandukanye bya Minembwe no mu nkengero zaho, amakuru atangwa n’abaturage n’abakurikirana ibibera aho avuga ko hari imirwano ikaze hagati y’Ingabo za Repubulika Iharanira Demokarasi ya Congo (FARDC), ingabo z’abarundi , n’imitwe yitwaje intwaro bifatanya ariyo Wazalendo na FDLR, ku ruhande rumwe, n’umutwe wa MRDP-Twirwaneho, umutwe w’itwaje intwaro uvuga ko urengera Abanyamulenge, ku rundi ruhande.
Iyi mirwano bivugwa ko yarushijeho gukaza umurego mu minsi ishize, kugeza ku wa Gatanu w’iki cyumweru, aho habaye ibitero byinshi mu duce dutandukanye tw’imisozi miremire ya Minembwe.
Amakuru atangwa n’abaturage bo muri ako gace avuga ko ibitero byagabwe ku manywa na nijoro byibasiye abaturage b’Abanyamulenge batuye mu bice nka Lundu n’utundi duce tuhakikije.
Icyakora, umutwe wa MRDP-Twirwaneho, bivugwa ko uyobowe ku rwego rwa gisirikare na Jenerali Charles Sematama, na wo wasubije ibyo bitero, usubiza inyuma ibitero byinshi, harimo n’ibyagabwe ku wa Gatanu. Ibyo byatumye bamwe mu basirikare basubira inyuma bahungira mu bice biri hafi ya Point Zero, birimo Bicumbi, Mutunda, n’utundi duce two mu misozi ihakikije.
Mu bindi bice bitandukanye nka Lundu, Bidegu, Kalongi, Gakenke na Kalingi, haravugwa ko imirwano ikomeye cyane igikomeje. Amakuru ataremezwa neza avuga ko habaye igihombo kinini ku mpande ziri mu mirwano, harimo FARDC, ingabo z’u Burundi, ndetse n’imitwe ya Wazalendo na FDLR.
Nubwo umubare nyawo w’abaguye mu mirwano utaramenyekana ku mugaragaro, bamwe mu baturage bemeza ko ushobora kurenga mirongo irindwi, bashingira ku mirambo yabonetse mu bice by’imirwano.
Byongeye kandi, amakuru ava mu baturage avuga ko imirambo y’abasirikare b’u Burundi, harimo n’abofisiye bakuru, yasubijwe mu gihugu cy’u Burundi. Hari n’ibirego bivuga ko iyo mirambo yajyanwaga hamwe n’ibicuruzwa bivugwa ko ari amabuye y’agaciro, ariko ibyo ntibyigeze byemezwa n’inzego zigenga cyangwa izemewe.
Hanavugwa kandi ko hari uduce tumwe na tumwe tugikomeje kugira ingaruka zikomeye z’iyo mirwano, aho hakigaragara imirambo mu bice bimwe na bimwe.
Mu gihe FARDC n’abafatanyabikorwa bayo nabo bivugwa ko bagihura n’ibihombo ku rugamba, amakuru yo mu baturage avuga ko hakomeje gukoreshwa indege zitagira abapilote (drones) mu bitero byo guturitsa ahatuwe n’abaturage b’Abanyamulenge, cyane cyane muri Lundu no mu bindi bice bya Minembwe.
Nanone bivugwa ko ejo hashize hongeye kugaragara ibitero bya drones nyuma y’igihe gito bitagaragara, bikangiza inzu z’abaturage mu bice bituwemo.
Kugeza ubu, nta tangazo ry’abari mu ntambara bireba ryemeje cyangwa ryahakanye aya makuru. Gusa, umutekano w’abaturage ba Minembwe ukomeje kuba mubi cyane, mu gihe hakiri imirwano ikomeje.
- 0
- 0
- 0
- 0
