Leta Zunze Ubumwe za Amerika yongeye kongera igitutu ku Rwanda nyuma yo gufatira ibihano ibigo bine bikora mu rwego rw’ubucukuzi n’itunganywa ry’amabuye y’agaciro, inatangaza ko hashobora gufatwa izindi ngamba mu gihe amasezerano yasinywe hagati y’u Rwanda na Repubulika Iharanira Demokarasi ya Congo (RDC) atazashyirwa mu bikorwa uko bikwiye.
Ibi byatangajwe na Massad Boulos, Umujyanama wihariye wa Perezida Donald Trump ushinzwe Afurika, mu ijambo yagejeje ku Kanama ka Loni gashinzwe Amahoro n’Umutekano ku wa 26 Kamena 2026.
Amerika: Impande zombi ntizubahiriza ibyo ziyemeje
Mu butumwa bwe, Boulos yavuze ko nubwo hashize umwaka u Rwanda na RDC bishyize umukono ku masezerano agamije kugabanya amakimbirane hagati y’ibihugu byombi, haracyari byinshi bitarashyirwa mu bikorwa.Yavuze ko RDC itarasenya umutwe wa FDLR nk’uko byari byarasezeranyijwe, mu gihe u Rwanda rutarakura ingamba zarwo z’umutekano muri Congo kandi rukomeje gushinjwa guha ubufasha umutwe wa M23.Yagize ati:
“RDC ntiyashoboye gusenya FDLR mu duce igenzura. U Rwanda ntirwacyuye ingabo zarwo kandi ntirwahagaritse inkunga ruha M23. Uku gutinda ntikukiri ukwihanganirwa, kandi kutubahiriza cyangwa kubangamira ishyirwa mu bikorwa ry’amasezerano bizakurikirwa n’izindi ngamba zo kubiryozwa.”
Aya magambo agaragaza ko Amerika ishobora gukomeza kongera ibihano ku ruhande izabona rutubahiriza ibyo rwiyemeje.
U Rwanda rumaze guhanwa inshuro ebyiri muri uyu mwaka
Ibi bihano bishya bikurikiye ibyafashwe ku wa 2 Werurwe 2026, ubwo Amerika yafatiraga ibihano bamwe mu bayobozi bakuru b’Ingabo z’u Rwanda (RDF).
Mu bahawe ibihano harimo:
Gen. Mubarakh Muganga, Umugaba Mukuru wa RDF.Maj.
Gen. Vincent Nyakarundi, Umugaba w’Ingabo zirwanira ku Butaka.
Maj. Gen. Ruki Karusisi, uyobora Diviziyo ya Gatanu.
Brig. Gen. Stanislas Gashugi, ukuriye Ingabo zihariye.
Amerika yavuze ko abo basirikare bashinjwa kugira uruhare mu gutera inkunga umutwe wa M23, harimo kuwutoza, kuwongerera abarwanyi no kuwufasha kwigarurira uduce dutandukanye two mu Burasirazuba bwa RDC.
Ku ruhande rw’u Rwanda, ibi birego byahakanywe, ruvuga ko ibihano byafashwe bibogamye kandi byirengagiza ikibazo cy’umutekano gituruka ku mutwe wa FDLR.
Ibihano bishya byibanze ku bigo bitunganya zahabu
Ku wa 26 Kamena 2026, Amerika yongeye gufatira ibihano ibigo bine byo mu Rwanda bikora mu rwego rw’ubucukuzi n’itunganywa ry’amabuye y’agaciro, cyane cyane zahabu, hamwe na bamwe mu bayobozi babyo.
Mu byafatiwe ibihano harimo:
Gasabo Gold Refinery Ltd.
Jean Malic Kalima, Perezida w’Inama y’Ubutegetsi wa Gasabo Gold.
Bosco Kayobotsi, Umuyobozi Mukuru wa Gasabo Gold.
Bugambira Mines Ltd.Wolfram Mining and Processing Ltd.Rwinkwavu Mining Corporation Ltd.
Amerika ivuga ko ibi bigo bifitanye isano n’ubucuruzi bwa zahabu ikomoka mu Burasirazuba bwa Congo, aho ishinja Ingabo z’u Rwanda gufasha mu kuyivanayo ikagezwa mu Rwanda mbere yo koherezwa ku masoko mpuzamahanga.
Ibihano byafashwe birimo gufatira umutungo ushobora kuba uri muri Amerika, no kubuza abaturage cyangwa ibigo by’Abanyamerika gukorana ubucuruzi n’abo bireba.
Kuki RDC itarafatirwa ibihano?
Nyuma y’ibi bihano, hakomeje kwibazwa impamvu Amerika itarafatira ibihano Leta ya RDC kandi nayo ishinjwa kutubahiriza ingingo z’amasezerano, cyane cyane izisaba gusenya umutwe wa FDLR.
Abasesenguzi bavuga ko hari impamvu nyinshi zishobora gusobanura uwo mwanzuro.
Icya mbere ni uko Amerika ifite inyungu zifatika muri RDC, zirimo ubufatanye mu rwego rw’umutekano ndetse n’ishoramari mu mabuye y’agaciro y’ingenzi ku bukungu bw’isi.
Icya kabiri, Amerika ivuga ko ibihano byayo bishingira ku bimenyetso bifatika bireba abantu cyangwa ibigo ku giti cyabyo, aho kuba ibihano bifatirwa igihugu cyose.
Nubwo bimeze bityo, amagambo ya Massad Boulos agaragaza ko Amerika ibona ko impande zombi zitarubahirije ibyo ziyemeje, ariko kugeza ubu igitutu gikomeye cyafashwe mu buryo bw’ibihano cyibanze cyane ku Rwanda.
U Rwanda rukomeje kwamagana ibi bihano
Leta y’u Rwanda yakomeje kuvuga ko ibihano byafashwe na Amerika bidashingiye ku isesengura ririmo impande zose z’ikibazo cyo mu Burasirazuba bwa Congo.
Kigali ishimangira ko ikibazo cy’umutekano kidashobora gukemurwa hatitawe ku ruhare rwa FDLR, umutwe u Rwanda rufata nk’uhungabanya umutekano warwo.
Mu gihe Amerika ikomeje gusaba ishyirwa mu bikorwa ry’amasezerano hagati y’impande zombi, haracyategerejwe kureba niba ibi bihano bishya bizagira uruhare mu kwihutisha ishyirwa mu bikorwa ry’ibyo u Rwanda na RDC byiyemeje, cyangwa niba bizarushaho kongera umwuka mubi hagati ya Kigali na Washington.
- 0
- 0
- 0
- 0
