Umuryango mpuzamahanga ukomeje kugaragaza akababaro no kwamagana iyicwa ry’abakorerabushake babiri b’imiryango y’ubutabazi bishwe mu burasirazuba bwa Repubulika Iharanira Demokarasi ya Congo (RDC).
Kuri uyu wa Gatatu, abinyujije ku rubuga rwa X, Komiseri w’Umuryango w’Ubumwe bw’u Burayi ushinzwe Ubutwererane Mpuzamahanga, Imfashanyo z’Ubutabazi n’Ibikorwa byo Gutabara mu Bihe by’Ibiza, Hadja Lahbib, yamaganye iyicwa ry’abakorerabushake babiri ba Croix-Rouge bishwe ku wa 16 Kamena mu karere ka Walungu, mu ntara ya Kivu y’Amajyepfo.
Yagize ati: “Abakorerabushake babiri ba Croix-Rouge bishwe bari mu butumwa bwabo muri Kivu y’Amajyepfo, muri RDC. Ibi byongeye kwibutsa ingaruka zikomeye abakozi b’ubutabazi bahura na zo ndetse n’akamaro ko kubahiriza amategeko mpuzamahanga agenga ibikorwa by’ubutabazi kugira ngo abaturage basivili barindwe.”
Iri tangazo rije rikurikira iryasohowe ku wa 23 Kamena na Croix-Rouge ya Repubulika Iharanira Demokarasi ya Congo, ryagaragaje akababaro gakomeye nyuma y’urupfu rwa Byamungu Mugisho Kabuha na Mugisho Mparanya Romain, barashwe n’abagizi ba nabi bataramenyekana mu mudugudu wa Kakumba, ku kigo nderabuzima cya Musiru.
Aba bakorerabushake bari mu gikorwa cyo kunoza uburyo abaturage bugarijwe n’ibibazo babona amazi meza yo kunywa.
Perezida wa Croix-Rouge muri RDC, Grégoire Mateso Mbuta Way, yibukije ko aba bagabo bari bambaye ikirango cya Croix-Rouge, ikimenyetso kizwi ku rwego mpuzamahanga gisobanura kutabogama, kutarobanura no gutanga ubutabazi ku babukeneye.
Yagize ati: “Igihombo cyabo ni urwibutso rubabaje rw’ingaruka zikomeye abakozi b’ubutabazi bahura na zo buri munsi mu burasirazuba bwa RDC.”
Croix-Rouge ivuga ko umutekano ukomeje kuzamba cyane muri teritwari ya Walungu no mu bice byinshi bya Kivu y’Amajyepfo. Intambara n’imirwano bihoraho bikomeje gutuma abaturage ibihumbi n’ibihumbi bava mu byabo bagahungira ahandi bashaka umutekano.
Uyu muryango uvuga ko igikorwa icyo ari cyo cyose cy’ihohoterwa gikorerwa abakorerabushake bawo kirushaho gukaza ikibazo, kuko kibangamira ubushobozi bw’imiryango y’ubutabazi bwo kugera ku baturage bugarijwe n’ibibazo.
Croix-Rouge yongeye gushimangira ko abakozi n’abakorerabushake b’ubutabazi bagomba kubahwa no kurindwa mu bihe byose, kandi ko iterabwoba cyangwa ibikorwa byose by’urugomo bibakorerwa bibujijwe burundu n’amategeko mpuzamahanga.
Isoza itanga icyubahiro n’ishimwe rikomeye kuri Byamungu Mugisho Kabuha na Mugisho MParanya Romain, ivuga ko baguye mu murimo wo gukorera inyokomuntu, basohoza ubutumwa bwabo bwo gufasha abatishoboye.
- 0
- 0
- 0
- 0
